البديل برس الأخباري

الاخبار العاجلة

ماشفتوها يا خلاني

Auth admin
21 Oct, 2024
214

أيام الهجرة العكسية …!'

علوب ..!!

الحب ( نعمة )

عندنا حبوبتنا كده هي عمة أبوي ( عليه رحمة الله ) جاتنا من ( بلدم ) نزلت عندنا ...!!!

وناس البيت فرحانين بيها شديد خاصة وإنها من ريحة الوالد الذي نفتقده ...!! ونعلم تضحياتها من أجله وأخوانه فقد توفي جدي وتركهم صغار ...!!

اسمها ( النعمة ) …وهي مره لذيذ كده ..وشخصية ...!!

كانو ملقبنها بالحكومة ..!! (رغم أنها الصغرى )

قالو كانت بتاجر وبتركب في ( اللوري ) وبتفاصل في المحاصيل ...اجتهدت في هذه الحياة ...وخبرت دروبها ..!!

ربت أولاد أخوها ديل ومن ضمنهم والدي ... !!

( النعمة ) كانت متزوجة من ( سعدوك ) ...!! الذي رحل ولم تنجب منه ...!!

وهي زوله وناااااسه كده وتحسا بيها عميييقه شديد

قلتا ليها انتي ياحبوبتي قالو راجلك ده مات وإنتي كنت صغيره ...!! ماعرستي مالك ...!!!؟؟

قالت لي كنتا بريدو ...!!

(فاجأتني الإجابة) ....!!

داير (اتفنقل) من الضحك ) .....!!

قلتا ليها حب عديييل كده ...!!

قالت ياهو ( الحب ) الواحد ده ....!!!

قلنا ليها ياخ هو في زمنكم دا كان في حب ..!!

قالو المرا بتشوف راجلا يوم (العقد ) اول مرة في حياتا ...!!

عملتيها لي علاقة كمان ...!!!

بس قالت كده اتصلحت في (العنقريب ) …!!

كانت ( منتكيه) ......!!

قالت لي إلا ( سعدوك ) ...!!!

أخدت ليها سرحه وتنهيده طوييييلة ....!!!

وقالت الله يرحمك يا السعدوك ......!!

بتصدق ياعلوب (سعدوك ) ده كان هو الماسك البياره بتاعة المويه الزمن داك ....!!

أها نحن بنات الحله الحته الوحيده الممكن ( نمشيلا ) ياها المحل ده ...!!!

وانا ماتشوف (كرمشتي )دي قسم المولي قاسي كنت موقفه الحله دي (ألف أحمر )

( رحاب القيامة النسخة القديمة )

أها أول ما أجي اشيل المويه (سعدوك ) ده الرجفه البتدخلو تحلف تقول ( ميرود....!!!

( يعني ( حرارتو مرتفعة ) ...!!! (لغير الناطقين بها ) ...!!!

والله ياعلوب الماسورة دي إلا يحركا الواحد فوق تحت حتي تكب المويه .....!!!

أها ( سعدوك ) ده وكت يجي دوري .....!!

يلاوي فيها ذي (الأسد ) النتر يكب لي المويه .....!!

وانا اتابع بمتعة )

أها و إنتي حاسا بالكلام ده ....!!!؟؟ باغتها بالسؤال ..!!

أجييي ….!! كيفن ماحاسا ...!!!

إلا ماني قادرة أقول حاجه.... !!!

عيب ...!!!

قلتا ليها ولا نظرة خاطفة كده ...!!

قالت لي

نظرة شنو يالممسوخ نحنا كنا (مبلمات ) ماشايفين قدامنا ...!!!

قلتا ليها أها وفي إحساس ...!!! ؟؟

قالت لي والله ياعلوب أنا وكتين كان يجي وكت المويه دي كأني ماشه الجنة ...!!

وكان لي مراد ماينتهي....!!

قلتا ليها أها وسعدوك ...!!؟

قالت النسوان شكنو لي شيخ الحلة ( المحجوب ) وهو في الحسبة خالي قالنلو (سعدوك ) بكب الموية كلها للنعمة ...!!

وتضحك

اها والقصة دي استمرت لي متين ..!!؟؟

( سألتها ) ...

قالت لي ...عندي ود عماً لي قال دايرني ..!!

بتصدق سعدوك مرض ..!!!!

( مرضان باكي فاقد ) ....!!

قلتا ليها اها والحصل شنو ..!!؟؟

قالت لي مرض رقد (كاضم ) ماعرفولو علاج ...!!

وأنا حسّيت سعدوك ده مرض في شاني بعد سمع الخبر الشين ده ....!!

ونحنا ياعلوب الزمن داك يعني مانقدر نقول حاجه ...!!!

إلا أنا ياعلوب سويتلي شيتن ماسبقني عليهو زول ...!!

وانا اتابع هذا المسلسل بلهفة) ...!!

( تقولي العشق الممنوع ....!!! العشق الممنوع هنا ياخ)

أها عملتي شنو ..؟ قلتا ليها ...!!!؟

قالت لي خالي (المحجوب ) ده كان بريدني شديد دونن عن الناس ...!!

عجبتني دونن دي عجب )

وهو ذاتو يعني كان راجلاً صعب بالحيل ..!!!

مشيتلو قلتلو ود عمي قال دايرني ...!! علا أنا مابدورو ...!!!

قال لي ده كلام شنو الأعوج ده آ النعمة ...!!!

قلتلو والله أياهو دا كلامي ....!! مابدورو ....!!!!

قالي في شان شنو...!!

مالو ..!!؟

قلتلو قالو ( بشرب ) ...!!!!

وأنا ياخالي مابدور لي زولا( بشرب ) ...!!

و إت كان بدورو لي ...!!

تراني موافقة ...!!!

قسمتا ياعلوبة حبيب قساي ...!!!

خليتلك خالي ده اتنفض التقول الحمى ..!!!

قال لي ...الله يلعنو الملعون ...!!

والله كان قلتي دايراهو ...!!!مادام بشرب ماياخدك ...!!! لعنة الله عليه ...!!

اها ياعلوب (سعدوك ) سمع الخبر قام ذي العجب ...!!!

وجا لي خالي المحجوب قالو أنا بدور (النعمة ) بتكم .....!!!

وكت خالي سألني ..!!

قتلو البتشوفو ...!!!

ضحك زييين وعاين لي ...

قالي ودا ذاتو بشرب ...!!!

( علا من البيارة ) ..!!!

مبروك آ النعمة ...

وعرستا (سعدوك ) ياعلوب...!! أكرمني وعزاني...!!! والله يوم واحد ماغلت علي ...!!

( سعدوك ) ياعلوب بصلي بعد الفرض ركعتين شكر إنو الله قسمني لي ...!!

مافي زولا كان بضحكني غير سعدوك ...!!

ومافي زولاً سهر علي ذي سعدوك..!!!

سعدوك كريم ...وراجلاً حنين .... والله أراد ماقسم لي منو الجنا ...!!

بس اخدت ليها سرحة كده وبراها قعدت تدندن ....!!!

وكنتا بدور اشوفو جناك ...ياسعدوك ...!!!

وكنت بدور هواك ... أنت السعدوك ....!!!

وان شاءالله فيها هناك ...ياسعدوك ...!!!

جنات عدن ولقاك يالسعدوك ...!!

اتهنا فيها معاك ..ياسعدوك ...!!!

وأتمو ليك مناك ... أنا السعدووك ...!!!

وتشيل وتقشقش في دميعاتا وتستغفر ..

( استغفر الله ..استغفر الله ....الله يرحمك يالسعدوك ...!!!

اها ياعلوب ده راجلاً بعرسو بعدو ...!!!!

( والرجال عندها كلهم سعدوك) ......!!!!! )

...!! أي حب هذا ووفاء ....!!! أي سحر هنا وبهاء ...

(خجلتني علي سؤالي ) .....!!

( عندما كان الحب كماء البيارة ...واضحى اليوم صورة وعبارة )

قلتا ليها أها ياحبوبه ماتمشي معانا الليله....!!!

قالت لي وين ...!!!؟

قلتا ليها ...!!! البياره ....!!

تضحك سااااي ...!!

الله يديك العافيه أيتها الكبيرة ......!!!!

كم أنت عظيمة ...!!!

( سعدوك ) الواحة ..!! والحب (نعمة )

ومافي حتي رسالة واحدة بيها نصبر شوية....

هل لديك تعليق؟

لن نقوم بمشاركة عنوان بريدك الالكتروني، من اجل التعليق يجب عليك ملئ الحقول التي امامها *

بحث

الاصناف

معرض الصور

الاشارات

مواقع التواصل

الاخبار المشابهة

حول عهد العدمية .. أي تاريخ سوف يكتب ؟ (٣_٥) ..* رشان اوشي

Auth admin
16 Nov, 2024

الطيب صالح : -

Auth admin
16 Nov, 2024

الطيب عبدالماجد يكتب عن هاشم صديق

Auth admin
10 Nov, 2024

الاخبار العاجلة